珠海本土粤菜，究竟係乜东东？一家名为盘谷的食肆，便打正招牌以此为卖点，并且赢得口碑无数。开业至今九个年头，饮食界冰河时期三年疫情亦挺过，足见其实力。

 盘谷餐厅设在一幢工厂大厦内，风格别树一帜。粤菜中的烧味当然不缺，被誉为镇店招牌菜嘅斗门荔枝木烤叉烧，用嘅并非梅头，而係五花肉。用所谓秘製酱料腌製半日，以斗门莲洲山头荔枝木，三百度炉温烤製，当然有其卖点。只是澳门人自小受冠男拖地叉烧薫陶，当然有五岳归来之器度。乜嘢风浪未见过？幸好此处瓣瓣有时瓣瓣掂，奄仔蟹焖鸡砂锅上，热辣辣香喷喷就令人回味无穷；芝士海胆酱焗万山对虾，甜酸鹹拿捏恰好，将虾嘅鲜爽带上另一层次。至于来自台山嘅生蚝，以香葱蒜子砂锅焗，上菜锅盖一开，香气扑面而来，未食已起到先声夺人之势。另外古法鲜花椒蒸海斑，肯定係令人回味无穷、多扒两啖饭嘅冶味菜。

 值得一提，原来此处尚有36个月嘅卤水狮头鹅头供应。但由于先前所点菜餚太多，当发现卤水鹅头时，已有失诸交臂之歎。但明乎人生就是欣喜与失落合奏的乐章下，才能谱出憧憬和希冀。所以今番未能一尝其味，便是“下次一定咪错过”嘅原动力。既然味蕾已有期待，人生又何憾之有？

 ·紫纹卿·