风靡一时嘅私房菜，有谓已经开到荼蘼。不过无论如何，私房菜依然拥有不少食家追捧，皆因其私隐度较一般食肆高，菜式亦不时不食，不会流水作业般平凡。近月在西湾的雍泰美膳，便体会到私房菜之妙。

 店内只设两间贵宾房，门外门内俱予人一丝不苟的精緻感，无论陈设、餐具、服务水平，一只大拇指是受之无愧。出品方面，先来前菜香酥凤尾鱼看似平凡，但入口鬆化而味鲜，就这种不亢不卑阵势先声夺人。不得不提其招牌主打玻璃黑松露乳鸽，松露的幽香沁透在13-15日嘅乳鸽之上，带点神秘嘅黑漆外皮，係拜墨鱼汁所赐，入口鲜嫩juicy且味觉複杂，难怪唔少城中名人皆慕名而至。

 至于鹹香鸡、富贵牡丹濑尿虾、冬菜油盐蒸海斑，以及桂花瑶柱炒菊花翅等俱是水準之作，却无太大惊喜。反而一道卖相精緻，貌似盆景嘅碧绿藤椒苏格兰蛏子皇，就绝对值得品题。蛏子嘅鲜味既不会被藤椒盖掩，而藤椒嘅酥麻，亦扮演着下把嘅重要角色，替嫩滑鲜甜嘅蛏子，衬托至天花板级数……对！呢种咁微妙嘅化学作用，霎时令人勾起当年骠叔同熊良锡嘅经典组合。

 行笔至此，私房菜是否已开到荼蘼？个人以为就似经典民谣Both sides now（两面看）般，实质是经营是否得法耳。

 ·紫纹卿·