港澳人好口福，羡煞唔少地方食客，皆因世界各地嘅美食包罗万有，几乎食乜有乜，只要有市场需求，保证成行成市。当然，偶尔比较偏嘅菜式，如峇里菜，就似养在深闺。

 位于福隆新街斜路嘅刁厨 · 纽利，主打峇里岛NURI'S烧猪肋骨，替食客提供另类选择。或许唔少人认为：唓！峇里菜咪即係印尼菜，巴东牛肉成日食喇，有乜咁特别喎？咁谂好似冇错，但就有谬之千里之嫌。

 先讲这道招牌烧猪肋骨，在峇里连世界知名旅游指南孤独星球Lonely Planet都鼎力推荐，打造NURI成着名品牌，真唔讲得笑。此外，个人比较欣赏金巴兰风味蓝青口。只可惜蓝青口来自新西兰而非法国，始终欠缺那种香滑嘅creamy口感。另外脆炸油甘鱼骹更係必食之选，介乎椒盐更胜椒盐的味道，结论就係：一流！

 名字别致嘅咕喱羊架，“咕喱”并非广东人所指苦力，而是峇里咖喱酱Gulai，此菜调味颇合个人心意，只是来自蒙古的羊架，一般人未必受落那种羶骚。需要预订嘅香草烧鸡不俗，香辣车轮牛舌腍滑冶味……尚有惊喜是餐后甜品海盐菠萝烧，将味蕾带至另一个境界。

 至此油生一念，假若下次再访此店时，蓝青口换成法国货，羊架来自新西兰或澳洲，则完美二字，这家特色餐馆应受之无愧吧！

 ·紫纹卿·