珠海自从将情侣中路向北延伸打造人工沙滩，加上日月贝以及城市阳台先后出现，已成为游人必到打卡热点。于城市阳台内，据闻一家单单装修就花咗一点八亿嘅“珠海湾壹号 · 盛宴”，更拥有摘星嘅实力。讲到咁巴闭，又岂能不探探其虚实？

 一入大堂，果然金雕玉砌熠耀非凡，该处除美轮美奂二楼大厅外，另有VIP房三十间，各有不同风格。粤菜同海鲜乃该店主打，于是在推荐下点了几个撚手菜。个人在鱼池閑逛时见到一条大黄衣，于东星与西星群中孤独得颇有性格，随即将之纳入餐单内，顺带噏咗句：两食叫厨房揸fit！点知就係随口一句……出事嘞！

 约三斤重的黄衣，估计两食应该离不开鱼身起肉炒球，头骹椒盐或焖凉瓜耳。及至上菜时，大砂锅以大量姜蒜粒同乾葱头铺底，鱼身起肉切厚片，加松露酱蒸焗，这个整法又唔错喎！弊就弊在憧憬最精彩嘅头骹，既非焖煮亦非清蒸，竟然係蘸粉浆炸之。惨在粉浆又厚又索油，上碟一望已难勾起食慾，皆因衣鱼类或斑类嘅鱼头，绝对係精华所在，而家搞到咁，你仲想摘星？

 但话分两头，该处其它出品都具水準，加上服务贴心环境一流，无论早茶或晚饭，确实係不错的选择。而错就错在嗰条孤独嘅黄衣出现……唉！或许呢啲就係造化之过吧！

 ·紫纹卿·